Bit jetzt kunn man uns blots hören: https://podcasters.spotify.com/pod/show/gaby-becker- jensen
Nu kann man uns ok lesen. Hier hebbt wi för jem en lütte Kostproov vun unse Kolumnen,
de wi för en Zeitung schrieven.
Wat heet egentlich „oolt“?
Bi en ole Wien is dat kloor: Dat is en Qualitätsteken, wenn de al wat
länger lagert. Aver wi is dat bi „ole Deerns“? Mött Deerns nich lever jung
ween? Dat sehn wi ja beten anners, as jem uk an unse Naam wies warrn
könnt. Wi wullen de Begreep „oolt“ en positive Bedüden geven. Wer oolt
is, hett allerhand belevt, kann veel vertellen un uk alltiet noch wat Nies
anfangen. Liekers is dat Ooltsien ja ok relativ. Kummt ganz op an, mit
wem Du Di verglieken deihst. Wenn Du en Tiet mit ener snackst, de veel
öller is as Du un Di denn in Speegel kickst, denkst Du: Minsch, wat bün
ik noch jung. Is dat annersrum, denn finnst Du Di oolt. Aver Hauptsaak is
doch, Du kannst noch jung denken un föhlen, denn mit dat Verglieken,
dat is uk so een Saak. Aver dorvun snacken wi annermal.
To veel för en Prinzess
Nülichs weer ik, mal wedder to`n Inhöden bi mien Enkeldochter. Ehr Prinzessen-
Rieck is en Droom för so ́n Deern: nich blots EEN Barbie-Popp! Nee, hier liggen
mehr as teihnmal so veel op de Deel! Ok ganz Niemoodsche in colored, curvy un
divers. Ok de Mann, Ken, is al lang keen enkelte een mehr. He swiert düchtig mit
siene kloonten Bröder in Barbies pink blinkernde Huusstand samt Cabrio un
Peerd. In düsse Kinnerstuuv is keen Wunsch mehr apen, dünkte mi. Aver mien lütt
Anni stunn merrn in de Överfloot un weer an ́t Klaagen: „Mir ist sooo
laaaaangweilig, Oma!“. Un ik dach bi mi: `Catrin, DAT Problem hest du dotomol
nich hat! Mit blots een Popp kunn ik eenfach glieks los wogen!` Weniger is doch
männichmal meist mehr.
